ما يبقى الوضع لا وحك داحي الباب
اذا باجر اجه اتشوفون فزعتنه
احنه اهل الحضارة الي ضربنه اطناب
معروفين احنه بطيب كهوتنه
مو سهلة الرخيص يسوم بينه يبيع
ولا سهلة الغريب يدوس عتبتنه
ولا نعرف ندنك راس للانجاس
من عباس صارت هيج غيرتنه
خدام الاجانب باجر يطلعون
والباعت شعرها اشلون تتحنه
مو تونس اضن من عدنه احسن ذيج
ولا مصر العروبة بيوم لحكتنه
احنه اول بلد معروف من اسنين
ابو الثورات احنه الناس سمتنه
احنه اهل التفك والفالة والمكوار
ولو صار الوطيس اتلوح غبرتنه
مثل احسين صرنه انثور ضد الجور
ما بايعنه فاجر كلها عرفتنه
جم ارهابي شفنه بصورة الخيرين
وجم طاغي ويزيد يريد بيعتنه
ميخالف لون رجعتوا الاستعمار
من دم الشهادة انريد زفتنه
مية يوم ردتوا اتقشمرون الناس
جا شنهو اتغير يا حكومتنه
[/size]
